पाल्पा बगनासकाली–२ पोखराथोककी गीता पाण्डेको बुटवलमा उपचारका क्रममा मृत्यु भएको छ।
उहाँ करिब १२ हप्ताको गर्भ अस्वस्थ भएपछि श्रीमानसहित चैत २७ र वैशाख ५ गते बुटवल जानुभएको थियो।
सुरुवातमा उहाँ इट्टाभट्टीस्थित खत्री नर्सिङ होममा उपचारका लागि पुग्नुभएको थियो। त्यहाँ नियमित फलोअप गरिएको थियो। पछि थप उपचारका लागि उहाँलाई जोनल फार्मेसीमा रिफर गरिएको थियो।
जोनल फार्मेसीमा गर्भपतन गराउन औषधि प्रयोग गरिएको थियो। त्यहाँबाट पनि प्रक्रिया सफल नभएपछि उहाँलाई इन्दुलेखा क्लिनिकमा लगिएको थियो। निजी क्लिनिकहरूमा घुमाउँदै उपचार गर्दा उहाँको ज्यान गएको आरोप छ।
घटनापछि प्रहरीले तीन जनालाई पक्राउ गरेको छ।
पक्राउ पर्नेमा खत्री पोलिक्लिनिककी सन्ध्या बस्नेत, जोनल क्लिनिककी नीलम घर्ती मगर र इन्दुलेखा क्लिनिकका खगेन्द्र पाण्डे रहेका छन्। प्रहरीले आवश्यक अनुसन्धान अगाडि बढाएको जनाएको छ।
इलाका प्रहरी कार्यालय बुटवलका प्रमुख प्रहरी नायव उपरीक्षक निशान्त श्रीवास्तवका अनुसार मृतकका श्रीमानले जाहेरी दर्ता गराउनुभएको थियो। प्रारम्भिक अनुसन्धानमा लापरवाहीपूर्वक औषधि प्रयोग गरिएको आशंका गरिएको छ।
अनुभवी चिकित्सकको सल्लाहमा सरकारी अस्पतालमा उपचार गराउनुपर्ने अवस्था रहेको बताइएको छ।
