पाल्पा,१० असोज
पाल्पाको तानसेनमा बिपद् तथा महामारीको समयमा यौन तथा प्रजनन् स्वास्थ्यमा पर्ने जोखिमको बिषयमा अभिमुखीकरण कार्यक्रम सम्पन्न भएको छ । शुक्रबार नेपाल परिवार नियोजन संघ पाल्पाको आयोजनामा बिपद् र महामारीमा यौन तथा प्रजनन् क्षेत्रमा पर्ने जोखिम र जोखिम न्युनिकरणमा सरोकारवालहरुको भूमीकाको बिषयमा प्रस्तुतीकरण गरिएको थियो ।
कार्यक्रममा संघका शाखा प्रबन्धम शोभाकान्त न्यौपानेले नेपाल परिवार नियोजन संघले परिवार नियोजनका साधन मात्र बितरण नगरि बिपद्को समयमा मानवीय सेवा समेत गर्ने गरेको बताउनुभयो । उहाँले परिवार नियोजन भनेको परिवारको ब्यबस्थापन पनि भएको बताउनुभयो । शाखा प्रबन्धक न्यौपानेले बिपदमा बिद्युतीय उपकरणले काम नगरेको बेला प्रजनन् स्वास्थ्यका बिषयमा सूचना पाटीबाट भएपनि जानकारी दिन सकिने बताउनुभयो । बिपद्को मौका छोपी हुन सक्ने जवरजस्ती करणी, बिपद् तथा महामारीमा गर्भवती तथा सुत्केरीहरुलाई पर्ने समस्यालाई संघले मुख्य प्राथमिकतामा राखेर कार्यक्रम ल्याएको छ । जिल्ला बिपद ब्यबस्थापन समितिमा समेत परिवार नियोजनका प्रतिनिधीहरु सहभागी हुने गरेको बताउदै उहाँले बिपदकै लागी भनेर ६ सेट मर्यादा सामग्री संघमा तयारी अबस्थामा रहेको जानकारी दिनुभयो ।
कार्यक्रममा महामारी तथा बिपदमा जिल्ला स्थित सरकारी निकाय, सुरक्षा, स्वास्थ्यका क्षेत्रमा काम गर्ने संघ संस्था पत्रकारहरुले खेल्नु पर्ने भूमीकाको बिषयमा प्रहसन समेत गरिएको थियो । बिःस २०१६ सालमा स्थापना भएको संघले ग्रामिण भेगमा स्वास्थ्य चौकी नहुदाको समय देखी नै सेवा दिदै आएको छ ।
