रूपन्देही, चैत ८
रुपन्देही जिल्लामा मुख्य कार्यालय रहेर पहिलाे पटक ट्रस्ट बिमा कम्पनी स्थापना भएको छ। शुक्रबार चैत ९ गतेबाट इन्स्योरेन्सको औपचारिक शुभारम्भ गर्ने गरि ट्रस्ट माइक्रो इस्योरेन्स कम्पनी स्थापना गरिएकाे हाे ।
रुपन्देहीको तिलोत्तमा आफ्नो केन्द्रीय कार्यालय रहेकाे छ । कम्पनीका अध्यक्ष जगतबहादुर पोखरेलले बिहीबार पत्रकार सम्मेलनको आयोजना गरी माइक्रो इस्योरेन्सको शुभारम्भ हुन लागेको बताए । बुटवलका ७१ जना सञ्चालकहरूको ७५ करोड लागतमा माइक्रो इन्स्योरेन्स शुभारम्भ हुन लागेको हो । कम्पनीका प्रमुख कार्यकारी अधिकृत उज्ज्वल ढुङ्गानाले सर्वसाधारणलाई भैपरी आउने दुर्घटनाजन्य तथा दैवीप्रकोपजन्य हानी नोक्सानीमा राहत दिने उद्देश्य रहेकाे पनि बताए ।
रूपन्देही जिल्लाकाे तिलोत्तमा नगरपालिका वडा नं. २ जानकी नगरमा केन्द्रीय कार्यालय रहेको कम्पनीको कर्पोरेट कार्यालय भने काठमाडौँ रहेको छ ।
कम्पनीले देशभर १८ वटा शाखा तत्काल विस्तार गर्ने गरी काम अगाडी बढाइएको बताइएकाे छ ।
