पाल्पा , समृद्ध जिवन विषयक प्रवचन कार्यक्रम रामपुर पाल्पामा सोमबार सम्पन्न भएको छ । जिवन विज्ञान सम्बन्धि जानकारी गराई जीवनलाई सुखि र समृद्ध बनाउन सक्षम बनाउने उद्देश्यले रामपुर नगरपालिकाको आयोजनामा प्रवचन कार्यक्रम गरेको हो ।
कार्यक्रममा बोल्दै रामपुर नगरपालिकाका नगर प्रमुख रमण बहादुर थापाले सुखि र समृद्ध जीवनका लागि योग ध्यान सहित सकारात्मक सोँचको खाँचो पर्ने बताउनुभयो । उहाँले भौतिक सुख सुविधाले मात्र मानिसको जीवन खुशी नहुने भन्दै आत्मज्ञान र आत्म सन्तुष्टिले मात्र सुखी र खुशी बनाउने बताउनु भएको छ । जीवनलाई समृद्ध र समाजलाई अनुशासित बनाउनका लागि सकारात्मक सोँच र आफुलाई चिन्न आवश्यक रहेको उल्लेख गर्नुभयो । नगर प्रमुख थापाले मानिसले आफुलाई चिन्न नसक्दा र सकारात्मक सोँचको कमीका कारण समाजमा विकृति विसंगति फैलिरहेको औँल्याउनुभयो । दरैठाँटी माध्यमिक विद्यालय रामपुर ६ विजयपुर पाल्पामा कार्यक्रममा समृद्ध जीवन विज्ञानका विशेषज्ञ योग साधक एल.पि. भानु शर्माले जीवनलाई समृद्ध बनाउन स्वयम आफु भित्रको क्षमताको पहिचान र हरेक आवश्यकता परिपूर्ति गर्नु पर्ने बताउनु भएको छ । साथै उहाँले अरुको आवश्यकता पुरा गरेर जीवनको समृद्धि हासिल गर्न सकिने बताउनुभयो ।
कार्यक्रममा रामपुर नगरपालिकाका प्रमुख प्रशासकीय अधिकृत सुर्य दर्शन पण्डितले प्रवचन सहितको प्रशिक्षणमा सिकाईएका कुरा व्यवहारमा लागु गरी जीवनलाई समृद्ध बनाउन आग्रह गर्नुभयो । रामपुर नगरपालिकाका प्रमुख प्रशासकीय अधिकृत सुर्य दर्शन पण्डितको अध्यक्षतामा भएको कार्यक्रम नगर प्रमुख रमण बहादुर थापाको प्रमुख आतिथ्यतामा सम्पन्न भएको हो । रामपुर नगरपालिकाका प्रवक्ता एवं वडा नं. १ का वडाध्यक्ष कपिल बहादुर खाँणको स्वागतबाट शुरु भएको कार्यक्रमको सञ्चालन योजना शाखा प्रमुख विक्रम बस्नेतले गर्नु भएको थियो । कार्यक्रममा नगरपालिकाका सल्लहाकार ,जनप्रतिनिधि , राजनितिक दल , विभिन्न विद्यालयका अध्यक्ष , प्रधानाध्यापक , शिक्षक अविभावक संघका अध्यक्ष , विद्यार्थी , पत्रकार लगाएतको सहभागिता रहेको थियो । कार्यक्रममा समृद्ध जीवन विज्ञानका विशेषज्ञ योग साधक एल.पि. भानु शर्माले जीवन विज्ञान सम्बन्धि प्रवचन दिनु भएको थियो ।
