पाल्पा, असार १२

तानसेन नगरपालिकाले श्रम स्वीकृति दिन सुरू गरेकाे छ । वैदेशिक रोजगारमा जानेहरुका लागि आवश्यक पर्ने श्रम स्वीकृति तानसेन नगरपालिकाका नगरप्रमुख सन्तोषलाल श्रेष्ठले तानसेन नगरपालिका–७ का प्रेमबहादुर कार्कीलाई प्रदान गरेर सेवा सुरू गरेका हुन् ।

नेपाल सरकार श्रम रोजगार तथा सामाजिक सुरक्षा मन्त्रालेले  वैशाख १ गतेदेखि स्थानीय तहमै श्रम स्वीकृति दिने निर्णय अनुसार पहिलो पटक श्रम स्वीकृतिको निस्सा दिएर सुरुवात गरिएकाे हाे । श्रम स्वीकृत लिन आउँदा कम्तीमा एक हप्ताअघि नै श्रम स्वीकृतको फाराम भर्न नगरपालिका रोजगार सेवा केन्द्रमा आउनुपर्ने रोजगार संयोजक राधा घिमिरेले बताइन् । श्रम, रोजगार तथा सामाजिक सुरक्षा मन्त्रालयको मन्त्रीस्तरीय निर्णयबाट व्यक्तिगत श्रम स्वीकृति र पुनः श्रम स्वीकृतिका लागि स्थानीय तहका रोजगार सेवा केन्द्रबाट नै आवेदन दिन सकिने व्यवस्था सरकारले गरेको छ । श्रम मन्त्रालयले पालिकाका रोजगार सेवा केन्द्रमार्फत वैदेशिक रोजगारमा जानेको अनलाइनबाट श्रम स्वीकृतिको आवेदनको व्यवस्था गरेको हो ।

वैदेशिक रोजगारीलाई व्यवस्थित, मर्यादित, सुरक्षित र ठगीरहित बनाउनका लागि श्रमिकलाई आवेदन भर्दादेखि नै सहयोगको आवश्यकता पर्ने भएकाले यो व्यवस्था गरिएको तानसेन नगरपालिका रोजजगार सेवा केन्द्रले जनाएको छ ।