पाल्पा, फाल्गुन ११
हिउँदयाम लाग्दै गर्दा पाल्पा सदरमुकाम तानसेनमा खानेपानीको हाहाकार भएको छ । तीन÷चार दिन बिराएर एक दिन घरमा आउने धारा पछिल्लो समय १०÷१५ दिनमा आउन थालेको उपभोक्ताको गुनासो छ । पानी हाहाकार भएपछि खानेपानी उपभोक्ता भने खानेपानी कार्यालयमा धर्नामा बस्न थालेका छन् ।
खानेपानी समितीको लागरवाहीले उपभोक्ताहरू खानेपानी जस्तो अनिवार्य आवश्यकताबाट बन्चित भएकाले धर्नामा बस्नुपरेको तानसेन नगरपालिकाका कार्यपालिका सदस्य तथा उपभोक्ता दिनेश गन्धर्वले भन्नुभयो । उहाँले पटकपटक खानेपानी समस्याका बारेमा ध्यानाकर्षण गराउँदा समेत समस्या समाधान नभएपछि धर्ना बस्नुपरेको बताउनुभयो ।
तानसेनकी गृहिणी गंगा पौडेलले प्रत्येक महिना खानेपानीको बिल तिर्दै आएपनि पिउनेपानी भने दुई सातासम्म नआएको दुखेसो गर्नुभयो ।
तानसेन खानेपानी उपभोक्ता समितिले बिद्युत भोल्टेजको समस्याको कारणले गर्दा पानी बितरणमा समस्या आएको जनाएको छ । समितीले सूचना जारी गर्दै पानी बितरणमा समस्या आएको बताउदै आएको छ ।
