पाल्पा, फागुन ३०
पाल्पाको बगनासकाली गाउँपालिका–२ रोकाडाडा स्थित सिद्दार्थ राजमार्ग सडकखण्डमा बोलेरो पिकअप र स्कुटर एकआपसमा ठोक्किँदा एक जनाको मृत्यु भएको छ।
पाल्पाको आर्यभञ्ज्याङ्गबाट बर्तुङतर्फ आउँदै गरेको लु १ प ३७४० नम्बरको बोलेरो पिकअपले विपरीत दिशाबाट जाँदै गरेको लु ८४ प ४३४८ नम्बरको स्कुटरसँग ठोक्किँदा दुर्घटना भएको हो।
दुर्घटनामा स्कुटर चालक माथागढी गाउँपालिका–१ निवासी ३६ वर्षीय खिलेश्वर घर्ती मगर गम्भीर घाइते भएको प्रहरीले जनाएको छ । घाइते मगरलाई उपचारका लागि लुम्बिनी मेडिकल कलेज प्रभास लैजाने क्रममा बाटोमै मृत्यु भएको बताईए पनि पुष्टि गर्न बाँकी छ । परिवारजनलाई अस्पताल बोलाईएको प्रहरीले जनाएको छ।खिलेश्वर घर्ती मगर भारतीय सेनामा कार्यरत रहेको वडाध्यक्ष राजकुमार पन्थीले बताए ।
बोलेरो पिकअपका चालक पूर्वखोला गाउँपालिका निवासी २५ वर्षीय युवकलाई नियन्त्रणमा लिई घटनाबारे थप अनुसन्धान भइरहेको जिल्ला प्रहरीले जनाएको छ।
