पाल्पा, माघ १६
पाल्पामा आगामी फागुन २१ गते हुने प्रतिनिधिसभाको निर्वाचनका लागि ठूलादलले महिलालाई उम्मेद्धार बनाएका छैनन् । निर्वाचनका लागि २९ जना उम्मेद्धारले उम्मेद्धारी दर्ता गराएकोमा महिला दुई जना मात्र उम्मेद्धार बनेका छन् । दुई निर्वाचन क्षेत्र मध्ये पाल्पा १ मा राष्ट्रिय जनमोर्चाले नरमती सिंजाली र पाल्पा २ मा नेपाल मजदुर किसान पार्टीले कृष्णशोभा मुस्याख्वलाई उम्मेद्धार बनाएको मुख्य निर्वाचन अधिकृत हरि प्रसाद शर्मा उपाध्याय पंगेनीले जानकारी दिनुभयो ।
जिल्लाबाट मुख्य ठूला राजनैतिक दलले महिलालाई उम्मेद्धारका रुपमा अगाडी बढाउन नसक्नु दुखद रहेको महिला अधिकारकर्मी मीना पन्थीले बताउनुभयो । उहाँले ५५ प्रतिशत महिला मतदाता हुँदा महिलालाई दलहरुले बिश्वास नदेखाउनु दुखत पक्ष रहेको बताउनुभयो ।
२०६४ सालको निर्वाचनमा (जतिबेला पाल्पामा ३ निर्वाचन क्षेत्र थियो ) तत्कालीन माओबादीले पाल्पा २ मा लीला सोमैलाई उम्मेद्धार बनाएर बिजय गराउन सफल भएको थियो । त्यस यता ठूला दलले महिलालाई उम्मेद्धार बनाउन सकेका छैनन् । फागुन २१ मा हुने प्रतिनिधिसभा निर्वाचनमा नेकपा एमालेले नारायणी शर्मा र नेपाली कांग्रेसले मीना पन्थीको नाम सिफारिस गरेर केन्द्रमा पठाएपनि टिकट भने महिलालाई दिन सकेनन् ।
दुई निर्वाचन क्षेत्र रहेको पाल्पामा २९ जना उम्मेद्धारले फागुन २१ गते हुने प्रतिनिधिसभाको निर्वाचनमा सहभागीता जनाउदै छन् । पाल्पा क्षेत्र न १ मा १३ र क्षेत्र न २ मा १६ जना दल तथा स्वतन्त्र उम्मेद्धारले २ सीटका लागि प्रतिशप्रर्धा गर्ने छन् । जसमा ६ जना स्वतन्त्र उम्मेद्धार छन भने अन्य सबै दलिय उम्मेद्धार हुन् ।
