पाल्पा, २४ साउन – श्री सिद्धिविनायक गणेश मन्दिर पाल्पा रथयात्राले यस वर्ष गौरवमय सयौँ वर्षको यात्रा गर्दैछ । साउन २६ गते भजनकिर्तन र २७ गते रथयात्रा गर्न लागिएको हो ।
श्रीनगर सिद्धिविनायक सहयोग समितिले मन्दिरको संरक्षण, विकास र जात्राको भव्यताका लागि सहयोग गर्ने व्यक्तित्व तथा संस्थालाई सम्मान गरेको गुठियार हिमाल दत्त श्रेष्ठले बताउनुभयो ।

कार्यक्रममा बोल्दै प्रमुख अतिथि तानसेन नगर प्रमुख सन्तोषलाल श्रेष्ठले गणेश मन्दिर पाल्पाको गौरव र इतिहास बोकेको सांस्कृतिक धरोहर भएको बताउँदै यसको संरक्षण र जात्राको निरन्तरताका लागि नगरपालिकाबाट आवश्यक सहयोग हुने प्रतिबद्धता जनाउनुभयो । उहाँले पुरानो संस्कृति जोगाउने अभियानमा नगरपालिका सदैव सक्रिय रहने पनि उल्लेख गर्नुभयो ।

सोही अवसरमा तानसेन गुठी काठमाडौंले रथयात्रा निकाल्दा ओढाइने धार्मिक छाता हस्तान्तरण गरेको थियो । करिब एक लाख १० हजार रुपैयाँ मूल्य बराबरको छाता पूर्वअध्यक्ष सर्जुलाल लिगलमार्फत समितिलाई प्रदान गरिएको हो । उहाँका अनुसार विशेष गरी नेवार समुदायको गुठीका रूपमा रहेको गणेश मन्दिरलाई आवश्यकताको आधारमा यो सहयोग गरिएको हो ।

कार्यक्रममा प्रमुख जिल्ला अधिकारी तोयनारायण सुवेदी, बुद्धिजीवी बुद्धिप्रसाद शर्मा, वडा अध्यक्ष बाबुरत्न शाक्य, भगवती गुठी व्यवस्थापन समितिका अध्यक्ष अशोक महर्जन, तानसेन गुठी शाखा अध्यक्ष सकुन्तला बज्राचार्य, नेपाल पत्रकार महासंघ पाल्पा अध्यक्ष कमलराज तिमिल्सिना लगायतका व्यक्तिहरूको उपस्थिति रहेको थियो । उपस्थित अतिथिहरूले पाल्पाका पुराना संस्कृतिको संरक्षणमा सबै पक्ष जुट्नुपर्नेमा जोड दिएका थिए । यस अवसरमा मदनलाल श्रेष्ठले गणेश जात्राको ऐतिहासिक पृष्ठभूमि र महत्वबारे जानकारी गराउनुभयो ।कार्यक्रमको अध्यक्षता केदारलाल श्रेष्ठले गर्नुभएको थियो भने संचालन सचिव दीपेन्द्र थैवले गर्नुभएको हो।