पाल्पा, १२ असार
जिल्ला प्रहरी कार्यालय पाल्पा २१ बर्षपछि हत्यामा संलग्न ब्यक्तिलाई पक्राउ गरेको छ ।
२०६१ साल असार १९ गते पाल्पाको साबिक सिलुवा गाबिस—९ हाल पूर्बखोला गाउँपालिका—१ गुनडाँडामा ५५ बर्षिय सासु चिनीसरा सार्कीको हत्या गरि फरार रहेका सोहि स्थानका ६६ बर्षिय पूर्ण बहादुर सार्कीलाई २१ बर्षपछि पाल्पा प्रहरीले पक्राउ गरेको हो । उनीहरु नाताले सासु ज्वाई पर्दछन् ।
पूर्ण बहादुर भारतमा लुकिछिपी बसेको र नेपाल फर्किने सूचनाको आधारमा जिल्ला प्रहरी कार्यालय पाल्पाको टोलीले आज बिहान करिब ४ बजेको समयमा बाँके जिल्ला नेपालगन्ज उप—महानगरपालिका—१५ स्थित जमुनाह भन्सारबाट पक्राउ गरेको जिल्ला प्रहरी कार्यालय पाल्पाका प्रहरी प्रमुख पवन कुमार भट्टराई पत्रकार सम्मेलन गरि जानकारी दिनुभयो ।
मृतको छोरीले दोश्रो बिहेगरि अन्यत्र गएपछि झगडा हुदाँ पूर्ण बहादुरले कुटपिट गरि घाँटी थिचेर हत्या गरि भारत तर्फ भागी फरार रहेको प्रहरीले जनाएको छ ।
पूर्ण बहादुरलाई मुलुकी ऐन,२०२० को ज्यान सम्बन्धी महलको १ नम्बर बमोजिम ज्यान सम्बन्धी कसूरमा जिल्ला अदालत, पाल्पाबाट मुलुकी फौजदारी कार्यबिधी संहिता, २०७४को दफा १४(१) बमोजिम ५ दिन म्याद लिई जिल्ला प्रहरी कार्यालय पाल्पाबाट थप अनुसन्धान कार्य भईरहेको जिल्ला प्रहरी कार्यालय पाल्पाका सूचना अधिकारी प्रहरी नायब उपरीक्षक सुनिल मल्लले जानकारी दिनुभयो ।
