भोजराज भट्टराई
पाल्पा २६, माघ
पाल्पाको तानसेन–३, स्थित अन्नपूर्ण होटलमा आजदेखि स्पा सञ्चालनमा आएको छ । स्पाको उद्घाटन सभामा बोल्दै तानसेन नगरपालिका प्रमुख सन्तोषलाल श्रेष्ठले जिल्ला थपिएको नयाँ आयामले पर्यटन विस्तारमा सहयोग पुग्ने विश्वास व्यक्त गर्नुभयो । उहाँले पर्यटन र कृषिमा गरिने लगानी दीर्घकालिन हुने भन्दै जिल्लाको आर्थिक चलायमानमा समेत पर्यटन र स्वास्थ्यसँग जोडिएको व्यवसायले सहयोग पुग्ने बताउनुभयो । ‘पर्यटन र कृषि क्षेत्र टिकाउ छन् यसमा लगानी गर्दै जाँदा दीर्घकालिन उपयोगिता रहन्छ ।’ श्रेष्ठले भन्नुभयो ।
कार्यक्रममा घरेलु तथा साना उद्योग कार्याल पाल्पाका प्रमुख सन्तोष कुमार पौडेल, पत्रकार महासंघ पाल्पाका अध्यक्ष कमलराज तिमिल्सिना, उद्योग वाणिज्य संघ पाल्पाका महासचिव समिरमान श्रेष्ठ लगायतले स्पा पर्यटन क्षेत्रकै पूर्वाधार भएकाले यसप्रति आम समुदायको धारणा परिवर्तन आवश्यक हुने औंल्याउनुभयो । व्यवसायी लक्ष्मण बस्यालले २० लाख बढीको लगानीमा उक्त स्पा सञ्चालनमा ल्याउनुभएको हो । उहाँले गुणस्तरीय सेवासहित सञ्चालनमा रहेको होटल अन्नपूर्णले पाल्पामै पहिलोपटक स्पा समेत सञ्चालनमा रहेकोले यसको प्रचार प्रसार र प्रयोगसहित सहयोग गर्न आग्रह गर्नुभयो । नेपालमा पहिलोपल्ट सन् १९९७ मा पोखराको फूलबारी रिसोर्टले पहिलोपल्ट स्पा भित्र्याएको थियो । यसलाई नेपालमा पानीबाट गरिने उपचार भनिन्छ ।
पाल्पामा पहिल्लो पल्ट सञ्चालनमा ल्याइएको स्पामा १७ वर्ष होटल हायात एजेन्सी र दुई वर्षबढी होटल सोल्टीमा स्पा व्यवसायमा आवद्ध अनुभवी कन्सलल्टेन्ट अशोक कुमार राईले सहजीकरण गर्नुभएको छ । उहाँले स्पा पानीबाट गरिने थेरापी रहेको र यसले शरीर, मन, विचार र आत्मसम्मानमा पूर्ण आन्द दिने बताउनुभयो । यसले शरीरमा सकरात्मक उर्जा उत्पन्न गर्न र तनाव कम गर्न मद्दत गर्ने उहाँको भनाई छ । उहाँले शरीरको सुरक्षा गर्न मसाज नै उपयुक्त भएको बताउनुभयो । कार्यक्रम सञ्चालनमा कुटुम्ब एफ.एम.का स्टेशन प्रबन्धक नारायण न्यौपानेले सहजीकरण गर्नुभएको थियो ।
