पाल्पा, १३ कार्तिक
सिद्धार्थ राजमार्ग अन्तरगत पाल्पाको रम्भा–३, अगाँहाखोलामा दुई ट्रक एक आपसमा ठोक्किदा चालकको मृत्यु भएको छ । मृत्यु हुनेमा रम्भा गाउँपालिका–३,पाल्पाका २३ वर्षीय भुवनसिंह राना रहेको प्रहरीले जनाएको छ । त्यस्तै सहचालक स्याङ्गजा वालिङ्ग १० का सन्जित खवास थापा घाइते हुनुभएको छ ।
गए राती करिब ११ बजेको समयमा बुटवलबाट पोखरातर्फ जाँदै गरेको लु १ ख ९३५१ नम्बरको ट्रकको ब्रेक फेल भई सोही दिशातर्फ गइरहेको ना १ क ७१२१ नम्बरको ट्रकलाई ठक्कर दिएको थियो ।
दुर्घटनामा परी लु १ ख ९३५१ नम्बरको ट्रक चालक रानाको मृत्यु भएको जिल्ला प्रहरी कार्यालय पाल्पाका प्रहरी नायव उपरीक्षक सुनिल मल्लले जानकारी दिनुभयो । रानाको लुम्विनी मेडिकल कलेज प्रभासमा उपचारको क्रममा मृत्यु भएको हो । घाईते हुने ना १ क ७१२१ नम्बरको ट्रकका सहचालक हुन ।
घटनाको बिषयमा थप अनुसन्धान भइरहेको प्रहरीले जनाएको छ ।
