काठमाडौं । भूकम्प प्रभावित जाजरकोट, रुकुम पश्चिमसहितका जिल्लामा पुनर्निर्माण स्वयंसेवक परिचालनको निर्देशिका निर्माण गर्न नेपाली कांग्रेसको पदाधिकारी बैठक बस्दै छ । प्रभावकारी हुने गरी स्वयंसेवक परिचालन गर्ने निर्णय गरेको कांग्रेसले निर्देशिका निर्माण गर्न लागेको हो ।

पार्टी सभापति शेरबहादुर देउवाले हिजोको पदाधिकारी बैठकमा स्वयंसेवक परिचालनका लागि निर्देशिका दिएर पठाउनुपर्ने भन्दै आवश्यक छलफल गरी स्वयंसेवकलाई ‘फिल्डमा पठाउन’ निर्देशन दिएका थिए । त्यसका लागि आज बैठक बसेर आवश्यक तयारी पूरा गरी केही दिनभित्रै स्वयंसेवक परिचालनको व्यवस्था मिलाउन लागिएको हो ।

महामन्त्रीद्वय गगन थापा र विश्वप्रकाश शर्माले भूकम्प प्रभावित क्षेत्रमा खाने बस्ने व्यवस्था गर्न कठिन हुने बैठकमा बिफ्रिङ गरेका थिए । प्रत्यक समूहले आफ्ना लागि खानेकुरा समेत लगेर आफैँ बस्ने व्यवस्था गरी बढीमा पाँच दिन त्यहाँ काम गर्ने महामन्त्रीद्वयले सोमबारको बैठकमा बताएका थिए ।

एकजना प्राविधिक ज्ञान भएको व्यक्तिसमेत राखेर १० जनाको समूह बनाएर २५ वटा समूह पहिलो चरणमा खटाउने कांग्रेसले निर्णय गरेको छ । सुत्केरी, वृद्धवृद्धा भएका परिवारलाई प्राथमिकतामा राखेर अस्थायी आवास निर्माण गरिने बताइएको छ ।