पाल्पा, कार्तिक २
जिल्ला प्रहरी कार्यालय पाल्पाका कार्यालय प्रमुख प्रहरी उपरीक्षक हेरम्ब शर्माले जिल्ला कारागार पाल्पाको आन्तरिक तथा बाह्य निरीक्षण गर्नुभएको छ । बिहिबार कारागार निरिक्षणका क्रममा प्रहरी प्रमुख शर्माले सम्पूर्ण प्रहरी कर्मचारीहरुलाई आवश्यक निर्देशन समेत दिनुभयो । कारागार कार्यालयको निरीक्षणको क्रममा पुरुष बन्दी गृहका प्रत्येक कोठामा पुगी कैदी बन्दीहरुलाई विजयादशमी, दिपावली,छठ लगायतका पर्वहरुको शुभकामना आदानप्रदान समेत सम्पन्न भएको छ ।
निरिक्षण कार्यक्रममा जिल्ला प्रहरी कार्यालयका प्रहरी नायब उपरिक्षक सुगन्ध श्रेष्ठ, कारागार कार्यालय पाल्पाका प्रमुख भगवानभक्त अर्यालले पुरुष सुधार गृह भित्र प्रवेश गरी बन्दी गृहको अवलोकन गर्नुभएको थियो । कार्यक्रममा प्रहरी प्रमुखको टोलीले बन्दी गृहमा रहेको भान्छाघरको अवस्था निरिक्षण गर्दै, कैदी बन्दीहरुको साथमा खाना समेत खानुभएको थियो । कारागारका चौकीदारले प्रहरी प्रमुखसंग संगै बसी खाना खान पाउदा विषय परिस्थितीलाई बिर्सेर अपनत्व महशुस भएको बताउनुभयो ।
