पाल्पा, असोज २२
पाल्पाको रामपुरमा पहिरोले जेसिबी सहित चालकलाई पुरेको छ । पहिरोमा परि जेसिबि चालक दाङ्ग जिल्ला शान्तिनगर गाउँपालिका १ का ३० बर्षिय धनबीर खड्काको मृत्यु भएको जिल्ला प्रहरी कार्यालय पाल्पाले जनाएको छ । रामपुर नगरपालिका वडा न १० मा सडक मर्मतको क्रममा पहिरो खस्दा जेसिबी र चालक पुरिएका हुन् । पहिरोमा परि घाईते भएका चालक खड्काको उपचारको क्रममा आज बिहान करिब ३ बजेको समयमा युनाईटेड मिसन अस्पताल तानसेनमा मृत्यु भएको जिल्ला प्रहरी कार्यालय पाल्पाका सूचना अधिकारी सुगन्ध श्रेष्ठले जानकारी दिनुभयो ।
रामपुरको मिलन चौतारी देखि टोक्से जाने पुरानो मोटर बाटो सफाइ गर्ने क्रममा सडक माथि बाट खसेको पहिरोले बा २ ख १९५७ नम्बरको जेसिबि पुरेको थियो ।
घटनाको बिषयमा थप अनुसन्धान जारी रहेको प्रहरीले जनाएको छ ।
