पाल्पा, भाद्र २०
पाल्पाको पर्यटन प्रर्वद्धनका लागी ३० बढी भारतीय पर्यटन ब्यवसायी पाल्पा आउने भएका छन् । नाट्टा पाल्पा क्याप्टरको संयोजनमा नेपाल भारत सिमा नजिकका भारतीय शहरका ३० जना पर्यटन ब्यवशायी र केही पत्रकारहरु समेत तानसेन आउने भएका हुन् । यही भाद्र २१ गतेको एतिहासिक तथा धार्मिक महत्वको श्री ७ रणउजिरेश्वरी भगवती खटजात्राको अवलोकन संगै पाल्पाका विभिन्न पर्यटकिय गन्तब्यहरुको पहिचान र प्रर्वद्धन गर्ने उद्धेश्यले २० गते बुधबार देखि २२ गते शुक्रवार सम्म उनीहरु पाल्पामा रहने नेपाल एशोेसिएशन अफ टुर एण्ड ट्राभल एजेन्टस्, पाल्पा च्याप्टरका अध्यक्ष राजिव शाहले जानकारी दिनुभयो ।
तानसेन आउने भारतीय पर्यटन ब्यवशायीहरुलाई बुधवार देखि नै जिल्लाका विभिन्न एतिहाशिक तथा धार्मिक स्थलहरुको भ्रमण गराइने छ । रिडि, रानीमहल, भैरवमन्दिर, अवलको सिद्ध गुफा, बराङ्दीको शिबजिको मन्दिर, बगनाँसकालीको तिनछाङ्गे झरना लगाएत जिल्लाका होटल तथा रिसोर्टहरुको अवलोकन गराइने पाल्पा च्याप्टरका संस्थापक अध्यक्ष प्रदिप उदयले जानकारी दिनुभयो ।
पछिल्लो समय पाल्पाको पर्यटन क्षेत्रलाई टेवा पुर्याएका तानसेनको प्याराग्लाईडिङ, भैरवस्थान मन्दिरको पाल्पा जिपलाईन, रानीमहलको बोटिङ्ग संगै तानसेन अनि जिल्लामा रहेका शामुदायिक होम स्टेमा समेत भारतीय पर्यटन ब्यवशायीहरुको परिचयात्मक भ्रमण रहने अध्यक्ष शाहको भनाई छ ।
२२ गते शुक्रवार पाल्पाली पर्यटन ब्यवशायीविच अन्र्तक्रिया र अनुभव आदान प्रदानको कार्यक्रम रहेको आयोजकले जनाएका छन् । पर्यटन प्रर्वद्धनका क्षेत्रमा लामो समय देखि सक्रिय नाट्टा पाल्पा क्याप्टरले यस अघि पर्यटकिय गन्तब्यहरुको पहिचानका लागी पदयात्रा समेत सम्पन्न गरेको छ ।
