केही दिनदेखि परेको लगातारको वर्षा कम हुँदै गएको जल तथा मौसम पूर्वानुमान महाशाखाले जनाएको छ । पश्चिम क्षेत्रबाट मौसम केही सुधार हुँदै गएको महाशाखाको भनाई छ।

महाशाखाको अनुसार अहिले बिहान कोशी प्रदेशमा सामान्य बदली छ। बाँकी भूभागमा आंशिकदेखि सामान्य बदली छ। कोशी र बागमती प्रदेशका केही स्थानमा हल्का वर्षा भइरहेको छ।

महाशाखाका अनुसार दिउँसो देशभर आंशिकदेखि सामान्य बदली रहनेछ । पहाडी भू–भागका केही स्थानमा हल्कादेखि मध्यम वर्षा र बाँकी भूभागका थोरै स्थानमा हल्का वर्षाको सम्भावना छ। कोशी, मधेस र लुम्बिनी प्रदेशका तराईका एकदुई स्थानमा हावाहुरीको सम्भावना छ।

विभागले राति देशभर आंशिकदेखि सामान्य बदली रहन बताएको छ । कोशी, वाग्मती, लुम्बिनी र गण्डकी प्रदेशका थोरै स्थानमा हल्का वर्षाको सम्भावना छ।

त्यस्तै मंगलबार र बुधबार पनि देशभर  आंशिक देखि सामान्य बदली रहनेछ। देशका केही भागमा हल्कादेखि मध्यम वर्षाको सम्भावना रहेपनि भारी वर्षा भने नहुने महाशाखाले जनाएको छ।