सुशीला रेग्मी
रामपुर (पाल्पा), १५ साउन
पाल्पा रामपुरको बेझाड बजार, रजघरा तथा मटेरी क्षेत्रका खाद्य पसलको अनुगमन गरिएको छ । रामपुर नगरपालिका, घरेलु तथा साना उद्योग कार्यालय पाल्पा, खाद्य प्रविधि तथा गुण नियन्त्रण डिभिजन कार्यालय पाल्पा, इलाका प्रशासन कार्यालय रामपुर, इलाका प्रहरी कार्यालय रामपुर, रामपुर उद्योग वाणिज्य संघको सहकार्यमा बजार अनुगमन भएको छ । रामपुर नगरपालिकाका उपप्रमुख तथा अनुगमन समिति संयोजक बालकुमारी थापाको नेतृत्वमा विभिन्न खाद्य पसलको अनुगमन गरिएको हो ।

अनुगमनमा क्रममा लेवल नभएका सामान खरिद बिक्रि, खाने र नखाने सामान छुट्टाछुट्टै राखेको, सरसफाईमा ध्यान नदिएको, साइन बोर्ड नराखेको, म्याद नाघेका सामग्री विक्रि गरेको पाइएको छ । अनुगमन टोलीले खाने र नखाने सामग्री छुट्टाछुट्टै स्थानमा राख्नुपर्ने, दर्ता गरेर मात्रै व्यावसाय संचालन गर्ने, सरसफाईमा ध्यान दिनुपर्ने, कारोबार थप गरेर मात्र संचालन गर्नुपर्ने, लेवल नभएका सामान खरिद बिक्रि नगर्ने, दर्ता कागजमा देखिने स्थानमा राख्ने, बिल विजक जारी गर्ने, साइन बोर्ड राख्ने, एक हप्ताभित्रमा लेवल नभएका सामग्री हटाउन सुझाव दिइएको घरेलु तथा साना उद्योग कार्यालय पाल्पाका उद्यम विकास सहजकर्ता मनोज घिमिरेले जानकारी दिनुभएको छ ।

टोलीले घ्यु, फुल्की, चकलेट, बिस्कुट, बेसार, सुजी लगायतका विभिन्न खाद्य सामग्री जफत गरेको छ । रामपुर नगरपालिकाका अनुगमन समितिका संयोजक तथा नगर उपप्रमुख थापा, निमिक्त प्रमुख प्रशासकिय अधिकृत चेमनप्रकाश पोखरेल, घरेलु तथा साना उद्योग कार्यालय पाल्पाका उद्योग विकास अधिकृत देवीराम भण्डारी, खाद्य प्रविधि तथा गुण नियन्त्रण डिभिजन कार्यालय पाल्पाका नरेश श्रेष्ठ, इलाका प्रशासन कार्यालय रामपुरका जीवन बस्याल, इलाका प्रहरी कार्यालय रामपुरका दलबहादुर बुढा, रामपुर उद्योग वाणिज्य संघका अध्यक्ष भोजेन्द्रप्रकाश ढकाल, पत्रकार लगायतको टोलीले अनुगमन गरेको हो ।