–सुशीला रेग्मी
रामपुर (पाल्पा), ३० जेठ
नियन्त्रणमा लिइएको अवैध रासायनिक मल (युरिया) राजश्व अनुसन्धान कार्यालय बुटवल पठाइएको छ । गत शनिवार (जेठ २७ गते) रामपुरको एक सटरमा भण्डारण गरी राखिएको भारतीय कम्पनीको ६५० बोरा अवैध मल फेला परेको थियो ।
सोमवार राजश्व अनुसन्धान अधिकृत सहित, करदाता सेवा कार्यालय पाल्पाका प्रमुख र जिल्ला प्रहरी कार्यालय पाल्पाका प्रहरी नायव निरिक्षक सहितको टोलीले रामपुरमा शिल गरेर राखेको मल अनुसन्धान कार्यालय बुटवल पठाइएको छ । रामपुर ५ बेझाड स्थित विजय श्रेष्ठको घरमा (सटर भाडामा) प्रधानमन्त्री भारतीय जनउर्वरक परियोजना भारत युरिया नामक रासायनिक मल भण्डारण गरिएको थियो ।
विल तथा कागज पत्र र सम्बन्धित व्यक्ति फेला नपरेपछि रामपुर नगरपालिकाका उपप्रमुख बालकुमारी थापाको संयोजकत्वमा जिल्ला प्रहरी कार्यालय पाल्पाका प्रहरी नायव उपरीक्षक वीरेन्द्र थापा सहितको सरोकारवालाको टोलीले शिल गरेर राखेको हो ।
हालसम्म भण्डारण गरेको सम्बन्धित व्यक्ति पहिचान नभएपछि सोमवार दिउँसो राजश्व अनुसन्धान कार्यालय बुटवल पठाइएको छ । प्रतिबोरा ४५ किलो बराबरको तौल छ । गत शनिवार विहान रम्भा गाउँपालिका १ हुँगीमा पनि अवैध रुपमा गाडीमा ल्याउँदै गरेको ३७२ बोरा युरिया मल प्रहरीले नियन्त्रणमा लिएर सोही दिन अनुसन्धानको लागि भन्सार कार्यालय पठाइसकिएको छ ।
