काठमाडौं । नेपाल राष्ट्र बैंकका गभर्नर महाप्रसाद अधिकारीले अहिले तरलता सहज हुँदै गएको बताएका छन् ।
शनिबार काठमाडौंको गोकर्ण रिसोर्टमा आयोजित एनसेल–बाह्रखरी गल्फ तथा आर्थिक परिसंवाद कार्यक्रममा उनले लगानी योग्य रकम बढेकाले उद्योगीहरुलाई फाइनान्सियल रिसोर्स अभाव नहुने बताए ।
“तपाईँहरु चिन्ता नगर्नुस् । तपाईँहरु ठूला आयोजना निर्माण गर्नुस् । बैंकहरु लगानी गर्ने स्थितिमा छन्,” उनले भने, “उत्पादनमूलक क्षेत्रमा लगानी बढोस् भन्ने हाम्रो लक्ष्य हो । त्यहीअनुसार नीतिमा सुधार हुन्छन् ।”
गभर्नर महाप्रसाद अधिकारीले बैंकहरूसँग दुई खर्ब लगानीयोग्य पुँजी भएको बताएका छन् । गभर्नर अधिकारीले अर्थतन्त्र विग्रियो भनेर आत्तिनुपर्ने अवस्था नभएको बताए । “अहिले जुन फाइनान्सियल तनाव थियो, त्यसमा क्रमशः सुधार हुँदै गएको छ । सीडी रेसीयोबाट हेर्दा बैंकहरुसँग दुई खर्ब लगानी योग्य पुँजी छ,” उनले भने ।
गभर्नर अधिकारीले ११ महिनाको आयात धान्ने विदेशी मुद्राको सञ्चिति भएको बताए । उनले गएको वर्ष झण्डै अढाई खर्बभन्दा माथि डेफिसिट भएको वीओपी अहिले सहज स्थितिमा रहेको जिकिर गरे । उनले अहिले १४८ अर्बको सकारात्मक बचतको स्थितिमा देश रहेको तथ्य प्रस्तुत गरे ।
