एग्रो टुरिजममा युवा आकर्षण

एग्रो टुरिजममा युवा आकर्षण

पाल्पा, जेठ २५
नेपालका कृषिको व्यावसायिकरण गर्नुपर्छ र सम्भव छ भन्ने उद्देश्यले सिर्जना फर्मले एग्रो टुरिजमलाई अगाडी बढाएको छ । काठमाण्डौंमा २०६८ सालदेखी फर्म सुरु गरेको संस्थाले जिल्लाको खस्यौली गाविस वडा नं. ७ मा २०७० सालदेखी तीन सय रोपनी जग्गा खरीद गरेर एग्रो टुरिजमको विकास गरेको छ ।
नेपाल कृषि प्रधान देश भईकन पनि कृषिलाई व्यवसायिकरण गर्न र विविधिकरण गर्न सरकारले प्राथमिकता नदिएपनि आफुहरुले त्यसको विकासकालागि पाल्पामा सिर्जना फर्म सञ्चालनमा ल्याएको संस्थाका प्रमुख कार्यकारि अधिकृत अमर गुरुङ्गले बताए । उनी भन्छन्, ‘एग्रो टुरिजम विकासका लागि तीन करोड लागतमा फर्म सुरु भयो । अहिले फर्म हेर्न आउने पर्यटकहरुको घुईंचो लाग्न थालेको छ । फर्ममा होम स्टे सँगसँगै व्यवसायिक कृषि तथा पशु फर्म सञ्चालनमा छ ।’ फर्ममा गत वर्ष एक हजार बढी समूह तथा व्यक्तिहरुले अवलोकन गरेको र यस वर्ष उल्लेख्य रुपमा वृद्धि हुँदै गएको गुरुङ्ग बताउँछन् ।
सिर्जना फर्ममा उन्नत जातको बाख्रा बोका ल्याएर ‘बिडीङ्ग’ गर्ने गरिएको छ । फर्ममा अहिले झण्डै एक सय बाख्रा तथा बोकाहरु रहेका छन् । गाउँका किसानहरुले यहाँको बोका सामुहिक रुपमा खरीद गरेर गाउँका काठे बाख्राबाट उत्पादनमा वृद्धि लिने गरेको संस्थाका प्राविधिक व्यवस्थापक जनक चौधरीले बताए । अहिले गाउँमा २० देखी ३० किलोसम्म हुने बाख्रा ५० किलोसम्म हुने गरेको छ । उनले लोकल खसीको बिक्रि गर्ने गरिएको बताए । फर्ममा २० वटा उन्नत गाई समेत छन् । गाईको दूधबाट विभिन्न परिकार बनाएरै पनि बेच्ने गरिएको छ । विभिन्न परिकार बनाएर बँचेको दूध तानसेनको डेरीमा बिक्रि समेत गरिन्छ ।
जिल्लामै पहिलो पटक सुरु भएको एग्रो टुरिजममा यतिबेला जिल्ला भित्रने स्वदेशी तथा विदेशी पर्यटकको प्रमुख गन्तव्य स्थलको रुपमा विकास हुँदै छ । फर्ममा व्यवसायिक रुपमै तरकारी खेती सुरु गरिएको छ । यहि उत्पादित कफिको स्वाद लिन स्थानीयहरु भीड लाग्ने गर्दछन् । बारी भरि सुन्तला, कागती तथा अन्य फलफूलका बिरुवा हुकैदैं छन् । यहाँ बस्न आउने पर्यटकहरुले यहि उत्पादिक अर्गानिक वस्तुको स्वादमा रमाउँदै आएका छन् ।
जिल्ला सदरमुकाम तानसेनदेखी १४ किलोमिटर पश्चिममा रहेको यस फर्ममा अहिले १५ जना कर्मचारी कार्यरत रहेका छन् । सिर्जना फर्म ४० जना बाहिरी जिल्लाका व्यक्तिहरुले सञ्चालन गरेका हुन् । फर्म सञ्चालक समितिको अध्यक्षमा राजेश श्रेष्ठ रहेका छन्् । सरकारी तवरबाट कुनै सहयोग नभएको फर्मले जनाएको छ । पानीको पर्याप्त व्यवस्था नभएको र बजार प्रवद्र्धनमा समस्या रहेको सञ्चालकहरु बताउँछन् । मुक्तिप्रसाद न्यौपाने

प्रतिक्रिया दिनुहोस