पाल्पामा चार पत्रकार, दुइ शिक्षक, दुइ स्वास्थ्यकर्मी चुनावी मैदानमा

पाल्पामा चार पत्रकार, दुइ शिक्षक, दुइ स्वास्थ्यकर्मी चुनावी मैदानमा

पाल्पा, वैशाख २५
पाल्पामा चार जना पत्रकार स्थानीय निर्वाचन २०७९ मा चुनावी प्रतिस्पर्धामा होमिएका छन् । वैशाख ३० गते हुने निर्वाचनका लागि जिल्लामा गाउँपालिका अध्यक्ष र वडाध्यक्षमा उनीहरुले उम्मेदवारी दर्ता गराएका हुन् ।
नेपाल पत्रकार महासंघ पाल्पाका निवर्तमान अध्यक्ष राजेशकुमार अर्याल नेकपा एमालेबाट तानसेन नगरपालिका वडा नं. ९ को वडाध्यक्ष पदमा उम्मेदवार बनेका छन् । यस्तै नेकपा एमालेबाटै तानसेन नगरपालिका वडा नं. ८ मा सोमनाथ अर्याल र ओमप्रकाश गैरे वगनासकाली गाउँपालिका वडा नं. ५ दर्लमडाँडाको वडा अध्यक्षको उम्मेद्वार बनेका छन् । यस्तै वगनासकाली गाउँपालिका अध्यक्ष पदमा स्वतन्त्रबाट अम्बिका पाण्डेले उम्मेदवारी दर्ता गराएकी छिन् ।
स्थानीय तहको निर्वाचनमा दुई जना प्रधानाध्यापक र दुई जना स्वास्थ्यकर्मी राजीनामा दिएर उम्मेद्वार बनेका छन् । माथागढी गाउँपालिकामा नेकपा एमालेबाट पालिका अध्यक्ष पदका लागि सिअहेब पदमा कार्यरत यमबहादुर चिदी र उपाध्यक्ष पदका लागि अनमी पदमा कार्यरत विष्णुमाया लुङ्चेले राजीनामा दिएर उम्मेद्वार बनेका हुन् । राजीनामा दिनुअघि चिदी जिल्लास्थित स्वास्थ्य वीमा बोर्ड प्रमुखको रुपमा कार्यरत थिए । लुङ्चे भने माथागढी गाउँपालिकाको गोठादी स्वास्थ्य चौकीमा अनमी पदमा कार्यरत थिईन् ।
यस्तै पूर्वखोला–५, स्थित गणपति माविका प्रअ विष्णु पल्लीले शिक्षकबाट राजीनामा दिएर उम्मेद्वार बनेका छन् । नेकपा एमालेबाट पूर्वखोला गाउँपालिका वडा नं. ५ को वडा अध्यक्षमा पल्ली उम्मेदवार बनेका हुन् । यस्तै जिल्लाको रामपुर नगरपालिका–९, को प्रगतिशील प्राविका प्रअ नेत्र गाहाले नेकपा एमालेबाट रामपुर ९ मा वडा अध्यक्षको उम्मेदवार बनेका छन् ।
तानसेन ९ मा वडाध्यक्ष पदमा उम्मेदवार बनेका राजेशकुमार अर्यालले झन्झटमुक्त सेवा प्रवाह, वडा कार्यालयमै कर प्रशासन, भष्टाचारमुक्त र सुशासनयुक्त स्थानीय सरकार, प्राविधिक शिक्षा, खेलकूद, कृषि तथा सीमान्तकृत समुदायको उत्थान जस्ता विषय समेटेर प्रतिवद्धता पत्र सार्वजनिक गरि चुनावी मैदानमा होमिएको बताए । तानसेनलाई विकेन्द्रीकरण गर्दै जनताको आवश्यकता र मर्म अनुसारका विकास कार्य गर्न आफ्नो उम्मेदवारी रहेको अर्यालले बताए ।

प्रतिक्रिया दिनुहोस