ग्राफिक्स डिजाइन मनाेरथ अर्यालले फेसबुकबाट पाए ६ लाखबढी पुरस्कार

ग्राफिक्स डिजाइन मनाेरथ अर्यालले फेसबुकबाट पाए ६ लाखबढी पुरस्कार

निस्दी गाउपालिका वडा नं. ५ गल्धा, पाल्पाका २५ वर्षिय मनोरथ अर्यालले ६ लाख भन्दाबढी पुरस्कार प्राप्त गरेका छन् । फेसबुकको सुरक्षा कमजोरी (बग) पत्ता लगाएर ५ हजार २ सय ५० डलर प्राप्त गरेका छन् । फेसबुकले ५ हजार अमेरिकी डलर रिवार्डसहित त्यसको ५ प्रतिशत बोनस पनि दिएको थियो ।

बुटबलमा एड्सवर्क मार्फत् सूचना प्रविधीकाे काम गर्दै अाएका अर्यालले व्यवस्थापन पढेका व्यक्ति हुन् । उनले डिजिटल मार्केटिङ सेवा प्रदान गरिरहेका छन् । उनले फेसबुकमा पेजलाई मेन्सन गर्दा पोष्ट पब्लिस नहुँदै मेन्सन गरेको पेजमा नोटिफिकेसन जाने समस्या पत्ता लगाएका थिए ।

उनले सन् २०२० को डिसेम्बरमा यो बग पत्ता लगाएका थिए । ‘मैले अरू व्यक्तिहरूको सामाजिक सञ्जाल व्यवस्थापन गरिरहेको हुन्छु,’ अर्यालले बोली खबरसंग कुरा गर्दै भने, ‘कहिलेकाँही आफ्नो पेजलाई मेन्सन गर्दा पनि त्यो समस्या देखें । २–३ पटक नै यस्तो समस्या देखेपछि डिसेम्बर २४ मा मैले रिपोर्ट गरेको हुँ ।’

उनले उक्त बगको बारे फेसबुकलाई रिपोर्ट गरेपछि फेसबुकले थप अनुसन्धानका लागि केही समय लिएको थियो । त्यसपछि उनले उक्त समस्याको भिडियो पनि फेसबुकलाई पठाएका थिए ।

‘बिचमा केही समय ग्याप भएको थियो । जुलाईमा मैले उक्त केसलाई पुनः खोलें,’ उनले भने, ‘अगस्ट १५ उताबाट रिपोर्ट समाधान भयो भनेर म्यासेज आयो । त्यसपछि अगस्ट १७ उनले तपाईको बग समाधान भएछ अहिले मेरोमा देखिएन भनेर रिपोर्ट गरें । त्यसपछि अगस्ट १९ मा फेसबुकले रिवार्ड दिएको हो ।’

शुरूमा उनले पठाएको भिडियोमा अस्पष्टता भएको र पुनः अर्को भिडियो पठाउन फेसबुकले अर्याललाई भनेको थियो । बीचमा व्यस्तताको कारण उनले पुनः भिडियो पठाउन सकेनन् ।

एक महिनासम्म उनले प्रतिक्रिया नदिएपछि उनीहरूले अहिले यस केसलाई बन्द गरेको र केसलाई पुनः खोल्न चाहनुहुन्छ भने पुनः खोल्न सक्नुहुन्छ भनेर म्यासेज पठाएको थियो ।

त्यसपछि विस्तृतमा फेरि भिडियो रेकर्ड गरेर पठाएपछि बग भ्यालिड भएर रिवार्ड पाएको उनी बताउँछन् । उनले पहिलोपटक बग पत्ता लगाएका हुन् ।

‘म पूर्ण ह्याकर त होइन । मैले बगमै भनेर कुनै काम गरेको थिएन्,’ उनी भन्छन्, ‘किनभने म पेशागत रूपमा ग्राफिक डिजाइन गर्छु र सामाजिक सञ्जाल व्यवस्थापन गर्छु ।’

प्रतिक्रिया दिनुहोस