‘कमेडी च्याम्पियन’ सिजन–२ सुरु

‘कमेडी च्याम्पियन’ सिजन–२ सुरु

काठमाडौं । नेपालको पहिलो स्ट्यान्ड अप कमेडी रियालिटी शो ‘कमेडी च्याम्पियन’ सिजन–२ को फिजिकल अडिसन सुरु भएको छ । बुधबारबाट काठमाडौंमा फिजिकल अडिसन सुरु भएको हो । 

डिजिटल अडिसनमा आएका भिडियो कन्टेन्टबाट उत्कृष्ठ १८० फिजिकल अडिसनमा सहभागी हुँदैछन् । पहिलो दिन बुधबार ४५ जनाले अडिसन दिएका छन् । निर्देशक विशाल भण्डारीका अनुसार यही दरमा दैनिक फिजिकल अडिसन लिइने छ । 

भदौ १५ गतेबाट सुरु भएको डिजिटल अडिसन असोज ३० सम्म लिइएको थियो । ६ हजारभन्दा धेरै डिजिटल अडिसनमा सहभागी थिए । १८० बाट २४ जना छनोट हुने र फेब्रुअरीको पहिलो साताबाट टेलिभिजनमा प्रशारण सुरु हुनेछ । कान्तिपुर टेलिभिजन र कान्तिपुर एफएमबाट एकसाथ प्रशारण हुने छ । ओएरआर डिजिटलबाट पनि सोही समय प्रत्यक्ष लाइभ हुने छ । 

फेब्रुअरी ६ बाट प्रशारण हुने सो शनिबार र आइतबार प्रशारण हुने छ । उत्कृष्ट १५ जनाबाट भोटिङ सुरु हुने निर्देशक भण्डारीले जानकारी दिए । “हासौं र हसाऔं भन्ने उद्देश्यले कोरोनाको त्रासबीच कार्यक्रम सुरु गरेका छौं । यो वर्ष गतवर्षको तुलनामा  दोब्बरभन्दा धेरै सहभागिता छ,” निर्देशक भण्डारी भन्छन् “प्राप्त भिडियो मध्ये करिब ४० प्रतिशत कन्टेन्ट हसाउँने आएको छ । यो अनपेक्षित हो । कारण गाउने जस्तो हसाउँने प्रतिभा घरघरमा हुँदैन । हसाउने प्रतिभा गाउँमा टोलमा एकजना हुने हो ।”

विजेताले कार र २५ लाख नगद पुरस्कार प्राप्त गर्नेछन् । दोस्रो सिजनमा पनि निर्णायक सिजन–१ कै सन्तोष पन्त, मनोज गजुरेल, प्रदीप भट्टराई र ऋचा शर्मा छन् । 

यो पटक मूल्यांकन फम्र्याट केही परिवर्तन गरिएको छ ।  सेट परिमार्जित र भब्य छ । भण्डारी भन्छन्, “गत वर्षभन्दा सेटमा मात्रै १५–२० लाख बढी खर्च भएको छ । कन्टेन्टमा पहिलो सिजनभन्दा चार गुणा बढी जनशक्ति थप गरिएको छ ।” ‘कमेडी च्याम्पियन’ सिजन–१ मा हिमेश पन्त विजेता बनेका थिए ।

प्रतिक्रिया दिनुहोस