आविष्कार केन्द्रले बनायाे इन्टरनेट बिना भिडियो हेर्न मिल्ने ‘ओकेट्युव’

आविष्कार केन्द्रले बनायाे इन्टरनेट बिना भिडियो हेर्न मिल्ने ‘ओकेट्युव’

काठमाण्डाैं, असाेज १५

यस्ता अनेक समस्याको समाधानको रुपमा एकजना नेपाली युवाले इन्टरनेट बिना चलाउन सकिने ‘युट्युव’ विकास गरेका छन् । राष्ट्रिय आविष्कार केन्द्रको सहयोगमा इलेक्ट्रोनिक्स इन्जिनियर राजेश दासले सवारी साधनलाई लक्षित गर्दै अफलाइनमा चलाउन मिल्ने ‘ओकेट्युव’ बनाएका हुन् । 

‘यसमा अफलाइन बसेरै भिडियो स्ट्रिमिङ गर्न मिल्छ । भिडियोका लागि हामीले कन्टेन्ट प्रदायकसँग छुट्टै सम्झौता गरेका छौं,’ दास भन्छन् । 

ओकेट्युवका लागि तयार पारिएको हार्ड ड्राइभमा नेपाली, हिन्दी, अंग्रेजी लगायतका चार हजारसम्म चलचित्र तथा म्युजिक भिडियोहरु राखिएका छन् । जसलाई सवारीसाधनमा राखिने डिभाइसमार्फत वाईफाईमार्फत ४० भन्दा बढी डिभाइसमा एकसाथ एक्सेस गर्न सकिन्छ ।

यो डिभाइस इन्टरनेटको कनेक्सनमा आउँदा मेन सर्भरबाट नयाँ भिडियोहरु आफैं अपडेट हुने गर्छन् । सवारीसाधनमा रहने ओकेट्युवको वाईफाई हटस्पटले ५० मिटरसम्मको दुरीमा सजिलै काम गर्न सक्छ ।

मोबाइल एप डाउनलोड गरेर वाईफाईबाट आनन्दसँग चाहेको भिडियोहरु हेर्न मिल्छ । दासका अनुसार एकसाथ ४० वटा डिभाइसमा यो वाईफाईले पाँच एमबीपीएसको गतिमा काम गर्न सक्छ ।

बीच बाटोको कुनै ठाउँमा खाजा तथा खाना खान रोकिँदा होटेल भित्रैसम्म यसको सिग्नल पुग्न सक्छ । अर्कोतर्फ नेपालको यातायात क्षेत्रमा अझैं पनि जीपीएस ट्र्याकिङ सिस्टम जडान सहज भइसकेको छैन ।

गन्तव्यका लागि हिँडेको बसमा बीचबाटोबाट चढ्ने यात्रुले गाडी कहाँ आइपुग्यो भनेर पटक पटक फोन गर्नुपर्ने हुन्छ । सवारीधनीले समेत आफ्ना स्टाफसँग त्यसैगरी निरन्तर सम्पर्कमा रहनुपर्ने बाध्यता छ ।

यस किसिमको समस्या समाधानका लागि ओकेट्युवका लागि विकास गरिएको डिभाइसमा जीपीएस ट्र्याकिङ सिस्टम समेत राखिएको छ । ओके जर्नी नामक छुट्टै कम्पनी खडा गरेर दास यतिखेर समग्र यातायात क्षेत्रलाई नै पूर्ण रुपमा डिजिटल प्रविधिमा लैजाने उद्देश्यका साथ लागिपरेका छन् ।

काउन्टरमा टिकेट काटेर हिँडेको बसमा बीचबाटोमा चढ्ने यात्रुको हिसाबकिताब सवारी धनीले पाउँदैनन् । कहाँबाट कति यात्रु चढे र ओर्लिए, त्यो सबैको भिडियो रेकर्ड राख्न यही डिभाइससँगै सीसीटीभी जोडिएको हुन्छ ।

जसबाट सवारीधनीले चाहेको बखत समग्र यात्राको गतिविधि नियाल्न सक्छन् । ओकेट्युवको भिडियो हेर्न तथा सवारीसाधानको जीपीएस ट्र्याकिङ गर्नका लागि छुट्टै मोबाइल एप बनाइएको छ ।

राष्ट्रिय आविष्कार केन्द्रमा महाबिर पुनसँग राजेश दास

जीपीएस ट्र्याकिङको लागि एपमा टिकेट आईडी राखे पुग्छ । ओके जर्नीको परियोजनाका लागि राष्ट्रिय आविष्कार केन्द्रले तीन लाख रुपैयाँ जति सहयोग उपलब्ध गराएको दास बताउँछन् ।

यसको अनुसन्धान र विकासको काम केन्द्रमै भएको हो । ओके जर्नीको फाइनल प्रडक्ट लकडाउन अघि मात्रै तयार भएको दासले जनाए ।

अहिले यो उपकरण बनेपा डिलक्समा केही बसमा प्रयोगमा आएको छ । बनेपा डिलक्सका गौर, पोखरा, बीरगन्ज, ठोरी, काकडभिट्टा, बुर्तिबाङ जाने बसमा यो सेवा उपलब्ध रहेको छ । सुरुवाती चरणको प्रतिक्रियाबाट राजेश दास हौसिएका छन् ।

उनी भन्छन्, ‘सबैतिरबाट राम्रो रेस्पोन्स आइरहेको छ । अहिले भर्खरै हामीले अतिथि यातायातका ११ वटा गाडीमा डिभाइस राख्नका लागि सम्झौता गरेका छौं । अहिले हामी लामो दुरीका साथै लोकल गाडीमा समेत यसलाई राख्ने योजनामा छौं ।’

ओकेट्युव यात्रुको सहजताका लागि मात्रै नभएर सवारीधनीका लागि समेत वैकल्पिक आम्दानीको स्रोत हुनेछ । यसमा प्रशारण हुने विज्ञापनको निश्चित कमिसन सवारीधनीलाई उपलब्ध गराइने दासले बताए ।  

यो डिभाइसका लागि कम्पनीले ३५ हजार रुपैयाँ मूल्य तोकेको छ । जसलाई १२ महिनासम्मको किस्तामा तिर्न सकिने विकल्प समेत रहेको छ । 

एकमुस्टरुपमा तिर्दा १० प्रतिशतसम्म छूट दिइने गरेको छ । यद्यपि सवारीसाधनको संख्याअनुसार डिभाइसमा थप छूट समेत दिन सकिने कम्पनीले जनाएको छ । 

ओके जर्नीको एपमा अनलाइनबाटै टिकेटको भुक्तानी गर्न सकिने सुविधा समेत छ । जसमा खल्ती डिजिटल वालेटबाट अनलाइन पेमेन्ट गर्न सकिन्छ ।

एपमा रहेका सेवाहरुमध्ये केही सेवा अफलाइन र केही अनलाइनमा प्रयोग गर्न सकिने किसिमका छन् । बस, सुमो, हाइस आदिमा टुर प्याकेज, सार्वजनिक यातायात र हवाइजहाजको अनलाइन टिकेटिङ, सवारीसाधन बुकिङ र होटेल बुकिङ आदि जस्ता सेवाहरु पनि एपमा राखिएका छन् । 

सँगसँगै सम्बन्धित सवारीसाधनका स्टाफहरुको नम्बर समेत एपमा उपलब्ध गराइएको छ । सम्पर्क नम्बरबाट मात्र नभएर च्याट गरेर समेत गाडीका स्टाफहरुसँग कुराकानी गर्न सकिने सुविधा छ । 

अनलाइन टिकेटिङसँगै फुडमाण्डु, भोज, फुडमारियो जस्ता फुड डेलिभरी सेवाप्रदायबाट यात्राको खाजा अर्डर गर्न सकिन्छ । यसरी गाडी हिँड्ने समयमा खाजा गाडीमै आइपुग्छ ।  

यात्रामा आइपर्ने सबै समस्या समाधान गर्ने योजनाका साथ आफूहरुले काम गरिरहेको दास बताउँछन् । ‘यसमा हामीले ट्राभल म्यानेजमेन्ट सिस्टम समेत राखेका छौं,’ उनी भन्छन् ।

अहिले २० वटा गाडीका लागि पाँच वटासम्म काउन्टर रहने अवस्था छ । त्यसका लागि कम्तिमा पाँच वटा कर्मचारी राख्नै पर्‍यो । त्यसको भाडाको बोझ अर्कोतर्फ छ ।

सञ्चारका लागि अलग्गै खर्च छुट्याउनु पर्छ । यसरी लामो दुरीको एउटा ट्रिपमा सवारीधनीको कम्तिमा मासिक ३० हजार रुपैयाँ खर्च भइरहेको हुन्छ । त्यस्तो सबै खर्च जोगाउन सकिने गरी यो प्लेटफर्म तयार पारिएको दास बताउँछन् ।

उनी भन्छन्, ‘एउटा सिमितिमा २० वटा गाडी छन् भने टिकेट काउन्टर, कर्मचारी, टिकेट प्रिन्टिङ, सञ्चार आदि गरी मासिक ७ लाख रुपैयाँसम्म खर्च भइरहेको हुन्छ । तर हामीले यस्ता सबै खर्च कटौती गरिदिन सक्छौं ।’

सँगसँगै पुरानो रेकर्ड राख्ने कुराको अभाव समेत यसले पूर्ति गरिदिन्छ । एपमा यात्राको फिडब्याक (प्रतिक्रिया) र रेटिङको फिचर समेत राखिएको छ । यात्रा, खाना तथा खाजाका लागि रोकेको ठाउँ, खान्की, बसको सिट, स्टाफको व्यवहार आदि सबैमा यात्रुले फिडब्याक दिन सक्छन् । 

यसरी दिइएको फिडब्याक एपमा सार्वजनिक रुपमा सबैले हेर्न मिल्छ । यसले सवारी धनी र स्टाफहरुलाई जिम्मेवार बनाउने र सेवामा सुधार ल्याउन सहयोग पुग्ने दासको विश्वास छ । 

एपका केही सेवा प्रयोग गर्न लग इन आईडी जरुरी हुन्छ । टिकट बुकिङ र फिडब्याकका लागि लग ईन आवश्यक पर्ने भएपनि अन्य सेवा प्रयोग गर्न त्यसको जरुरत पर्दैन । 

प्रतिक्रिया दिनुहोस