पाल्पा, फागुन २९
माथागढी गाउँपालिकाले आर्थिक वर्ष २०७५÷७६ मा ८ वटै वडा कार्यालयसँगै गाउँपालिकामा पनि र्सावजनिक सुनुवाई कार्यक्रम सम्पन्न गरेको छ । जनताको सूचनाको हकलाई स्थापित गर्न सबै वडा कार्यालयहरुमा सार्वजनिक सुनुवाई गरिएको गाउँपालिकाले जनाएको छ ।
फागुन ६ गते बहादुरपुर, ७ गते रहबास, ९ गते गोठादी, १२ गते हात्तिलुङ १४ गते झडेवा, १९ गते रुप्से र २३ गते चिदीपानी र कसेनी वडामा सार्वजनिक सुनुवाई सम्पन्न गरिएको गाउँपालिकाले जनाएको छ । गाउँपालिकामा आयोजित सार्वजनिक सुनुवाईमा कक्षा १ र ६ मा स्थानीय पाठ्यक्रम लागु गर्ने तयारीमा जुटेको गाउँपालिका अध्यक्ष सन्तोषकुमार थापाले बताए ।

माथागढी गाउँपालिका अध्यक्ष सन्तोष कुमार थापाले भने, मगर संस्कृतिको जगेर्ना गर्न माथागढी गाउँपालिकाको लेटरप्याड, स्टाम्प र सरकारी निकायमा मगरी भाषा लेख्ने निर्णय गरेका छौं । गाउँपालिकाले योजनामा पारदर्शीता, उत्तरदायित्व तथा सूचनाको हक स्थापित गर्न योजना सञ्चालन पूर्व उपभोक्ता समितिहरुलाई तालिम समेत प्रदान गरिएको बताए । उनले बस्तीस्तरबाट आएका योजनाहरु कार्यान्वयनमा रहेको बताए । माथागढी गाउँपालिकाले आयोजना गरेको चालु आवको पहिलो सार्वजनिक सुनुवाईमा प्रगति सार्वजनिक गर्दै प्रमुख प्रशासकीय अधिकृत दीपककुमार नेपालीले गाउँपालिकाले ४ सय ४८ योजना सञ्चालनको क्रममा रहेको बताए । उनी भन्छन्, ‘गाउँपालिकाले सबै वडा कार्यालयहरुमा पनि सार्वजनिक सुनुवाई कार्यक्रम सम्पन्न गरेको छ । सुशासनको प्रत्याभूति जनतालाई गराउन स्थानीय सरकार लागि परेको छ । हामी जनताका आधारभूत आवश्यकतामा केन्द्रीत रहेर कार्यक्रमहरु कार्यान्वयन गरिरहेका छौं ।’
सार्वजनिक सुनुवाई कार्यक्रममा चिदीपानीकी तुलसा न्यौपानेले आफु भूकम्पको वास्तविक पीडित भएर पनि घर बनाउँदा रकम नपाएको बताईन् । उनी भन्छिन्, भूकम्प जाने बित्तिकै घर बस्नै नसकिने गरि भत्कियो, घर बनाएँ । अहिले प्राविधिकले मूल्याङ्कन गरिदिएनन् । जसका दुई वटा घर छन् वास्तविक पीडित होईनन् तर राहत पाए ।’ गाउँपालिकालाई सुझाव व्यक्त गर्दै शिक्षक कृष्ण रानाले स्थानीय पाठ्यक्रम छिटो लागु गरि संस्कृतिको जगेर्ना गर्नुपर्ने बताए । उनले चालु आवमा शिक्षकले समयमै तलब खान नपाएको बताउँदै मसलन्दको रकम समेत निकासा नगरिदिँदा विद्यालयमा समस्या थपिएको बताए । रुप्सेकी कृष्णकला भूषालले गाउँपालिकाको केन्द्र तोक्न माग गरिन् । चिदीपानीका राजकुमार पन्थीले माथागढी गाउँपालिकाप्रति जनताको आकर्षण नरहेको आरोप लगाए । उनले जनप्रतिनिधिहरु धेरै योजनाहरुमा आँफै प्रत्यक्ष लाभसँग जोडिएर कार्यक्रम सञ्चालन गर्दा वास्तविक जनता मर्कामा परेको चर्चा गरे । उनी भन्छन्, ‘जनप्रतिनिधिहरुसँग जनताको अपेक्षा धेरै भयो तर सो अनुसार कार्यसम्पादन हुन सकेको छैन । अतिविपन्नका लागि उचित कार्यक्रम छैन । उपभोक्ता समितिमा सबै राजनीतिक दलका प्रतिनिधिहरु राख्नुपर्यो ।’
कार्यक्रममा नेकपामा प्रतिनिधि बिमल काफ्ले, नेकपा माथागढी संयोजक हरि चौहान, नेपाली कांग्रेस माथागढी संयोजक बालकृष्ण जिसी, राप्रपाका राजेन्द्र जिसीले गाउँपालिकालाई सुझाव व्यक्त गरेका थिए ।